CCOO celebramos unha importante vitoria xudicial tras unha sentenza do Tribunal Supremo que confirma que as empresas non poden recortar a retribución variable por incapacidade temporal nin por permisos retribuídos.
Neste procedemento, CCOO participou activamente no litixio xunto con UGT, reafirmando o noso compromiso na defensa dos dereitos do persoal ata as últimas consecuencias.
O Tribunal Supremo, na súa Sentenza n.º 35/2026, de 16 de xaneiro de 2026, declara nula a práctica empresarial de descontar do cálculo do incentivo os días non traballados por IT ou por permisos retribuídos, ao se tratar dun sistema baseado en «xornadas produtivas» implantado unilateralmente pola empresa Ayesa Ibermática S.A.U.
Paralelismos con modelos retributivos como o de CaixaBank:
○ Sistema de retribución variable baseado en criterios internos de «produtividade».
○ Modelo implantado unilateralmente pola empresa, sen negociación colectiva.
○ Exclusión de días de IT e permisos retribuídos do cálculo do incentivo.
Desde CCOO consideramos que esta sentenza fixa un criterio claro e plenamente aplicable aos modelos de retribución variable como o de CaixaBank. Por iso instamos a dirección a negociar de forma inmediata un acordo que garanta que:
○ A IT non implique recortes na retribución variable;
○ Os permisos retribuídos non se traduzan en penalizacións salariais;
○ Se eliminen criterios unilaterais que converten dereitos en perda económica.
CCOO seguiremos defendendo, onde corresponda, que ningún traballador ou traballadora perda salario por incapacidade temporal nin por exercer dereitos recoñecidos legalmente.