Os dereitos non se conquistan con estratexias xurídicas sen base, senón con organización, mobilización e negociación real nas mesas onde se toman as decisións que afectan a miles de familias
O Tribunal Supremo vén de ditar unha sentenza definitiva que avala a actuación sindical de Comisións Obreiras (CCOO) e resolve o conflito iniciado polo sindicato CIG en relación coa negociación do «plus sede» en Inditex.
Esta resolución ratifica a postura previa da Audiencia Nacional e confirma que a estratexia de negociación a nivel estatal é plenamente lícita, desestimando as alegacións de vulneración da liberdade sindical.
As claves do recurso da CIG e a resposta xudicial
A CIG presentou un recurso alegando que Inditex vulnerara a súa liberdade sindical ao trasladar a negociación deste complemento salarial, que anteriormente se trataba no ámbito provincial, ao ámbito estatal. O argumento principal era que, nese nivel nacional, o sindicato galego carece da representatividade suficiente para participar na mesa de negociación.
Non obstante, o Tribunal Supremo foi tallante na súa resposta e desestimou as pretensións da CIG baseándose en puntos xurídicos claros:
- Validez da mesa estatal: A mesa de negociación está legalmente constituída e os acordos alcanzados nela por sindicatos con representatividade nacional, como CCOO, son válidos para todo o cadro de persoal.
- Cambio de ámbito de negociación: A lei permite que materias negociadas anteriormente a nivel provincial pasen ao ámbito estatal se existe lexitimación para iso. Non existe un dereito adquirido a manter un tema «bloqueado» localmente de forma perpetua.
- Representatividade obxectiva: A exclusión da CIG non é unha manobra antisindical, senón unha consecuencia legal directa de non acadar o 10% de representación esixido a nivel nacional.
Aval á estratexia de negociación colectiva de CCOO
Esta sentenza non só pecha a vía xudicial, senón que supón un aprobado á estratexia de negociación colectiva estatal que defendemos dende CCOO. O Alto Tribunal confirma que este marco é unha ferramenta legal, sólida e eficaz para homoxeneizar e mellorar as condicións laborais en todos os centros de traballo de Inditex.
Os dereitos conquístanse con organización, mobilización e unha negociación real nas mesas onde se toman as decisións, e non mediante estratexias xurídicas sen base legal. Dende CCOO seguimos traballando para que cada acordo se traduza nun avance tanxible en dereitos e salarios para as miles de familias afectadas.