As catro xornadas de folga no comercio de alimentación da Coruña saldáronse cun «éxito rotundo» e un seguimento maioritario pola parte dos cadros de persoal. Os sindicatos CCOO, CIG, UGT e USO manteñen o calendario de mobilizacións na provincia ante a persistencia do bloqueo patronal na negociación do convenio colectivo.
Tras o paro realizado o pasado 29 de maio e ante a falta de avances reais na mesa negociadora, as organizacións sindicais convocaron catro novos días de folga os días 21, 22, 23 e 24 de xuño, coincidindo coas datas de maior consumo do San Xoán.
Mobilizacións nos supermercados da provincia durante o San Xoán
O seguimento masivo dos paros veuse reforzado por manifestacións de gran participación en catro localidades estratéxicas da provincia:
- A Coruña: Saída desde a Praza de Lugo.
- Santiago de Compostela: Desde o Gadis da rúa Montero Ríos.
- Ferrol: Desde o Gadis de Ultramar.
- Ribeira: Desde o Hiper Gadis.
Ademais destas marchas, tiveron lugar diversas concentracións informativas diante de diferentes supermercados destas cidades. Desde a Federación de Servizos de CCOO confían en que esta contundente resposta do persoal obrigue de inmediato á patronal a rectificar e retomar unha negociación efectiva.
Melloras salariais para afrontar os gastos básicos
O responsable do sector de Alimentación de CCOO en Galicia, José Ramón Romero, explicou que a estratexia de convocar catro días de folga seguidos respondeu a razóns organizativas. O obxectivo era evitar que as plataformas loxísticas puidesen compensar a falta de persoal mediante a imposición de horas extraordinarias ou a contratación eventual.
Os sindicatos denuncian que a negociación do convenio do comercio de alimentación da Coruña permanece estancada mentres o persoal reclama melloras laborais e salariais urxentes. «Non falamos de vivir con luxos; falamos de poder pagar unha vivenda, asumir os gastos básicos e facer unha compra normal do día 1 ao 31 traballando 40 horas semanais», sinalou Romero.
Longas xornadas, parcialidade e beneficios empresariais
As protestas tamén poñen o foco sobre outros problemas estruturais que sofren as traballadoras e traballadores do sector, tales como:
- As longas xornadas de traballo e a falta de descanso efectivo.
- A elevada taxa de contratos de parcialidade.
- A perda acumulada de poder adquisitivo nos últimos anos.
Desde a representación sindical lémbrase que as principais empresas de distribución alimentaria continúan a rexistrar importantes beneficios económicos, mentres que os cadros de persoal soportan unha carga de traballo crecente sen ver compensado o seu esforzo.
CCOO advertimos do bloqueo na negociación colectiva en Galicia
O secretario xeral de CCOO-Servizos, Iván Cordeiro, encadrou o conflito do comercio de alimentación da Coruña nun escenario máis amplo de bloqueo da negociación colectiva a nivel autonómico.
Cordeiro advertiu de que esta folga «non é a causa do conflito, senón a consecuencia de meses de negociación sen avances significativos» en materias clave como os salarios, a xornada e as condicións de traballo. Nun contexto de excelentes resultados empresariais, os traballadores esixen participar de forma xusta na riqueza que axudan a xerar.