CCOO criticamos que se amplíen horarios na hostalaría da Coruña, Sada e Betanzos en Semana Santa sen ter conta o persoal

CCOO Servizos denunciamos a decisión dos Concellos da Coruña, Sada e Betanzos de autorizar a ampliación dos horarios da hostalaría durante a Semana Santa sen consultar coa representación sindical. Esta medida aplícase en plena negociación do novo convenio provincial, marcada polas propostas regresivas da patronal.

Ampliación de horarios sen diálogo

Os gobernos locais permitiron aumentar en dúas horas a apertura dos establecementos tras a petición das asociacións de hostalaría, co obxectivo de incrementar as vendas e os beneficios. CCOO critica que as administracións e os empresarios loen decote o esforzo do persoal, pero o ignoren por completo ao tomar decisións que obrigan a ampliar as xornadas de traballo.

As traballadoras e os traballadores do sector son persoas con dereitos consolidados e non máquinas que se poidan acender e apagar segundo as necesidades empresariais.

Preguntas sobre dereitos laborais

Ante a falta de planificación conxunta e previsión, a Federación de Servizos de CCOO expoñemos varias dúbidas sobre a aplicación real destas dúas horas extra:

• Haberá unha retribución específica para o persoal ante esta situación especial?
• Respectarase a voluntariedade á hora de realizar horas extraordinarias?
• Garantirase o límite legal máximo de nove horas na xornada diaria?
• Cumprirase co descanso obrigatorio de doce horas entre xornadas laborais?

Negociación bloqueada pola patronal

Esta ampliación de horarios chega nun momento de especial tensión laboral na provincia. CCOO subliñamos o rechamante que resulta que os mesmos empresarios que agora esixen a máxima dispoñibilidade e esforzo dos cadros de persoal, sexan os que manteñen bloqueada a negociación do convenio de hostalaría da Coruña.

A patronal mantén unha postura obstinada na mesa negociadora, ofrecendo incrementos salariais ridículos e formulando recortes nos dereitos xa adquiridos. O sindicato conclúe que as empresas queren máis horas de traballo ignorando totalmente as necesidades de quen as realiza.